Toti Martínez de Lezea, eleberri historikoen egile ezagunak Euskal Herriko sorginen gaia hartu du oraingo honetan, gai ezaguna zinez, baina aldi berean luzaro ezezagun egon dena. Liburu hau idaztean, XVI-XVII. mendeetan berebiziko garrantzia izan zuen gertaera hori, gaur egunera arte interes eta jaminmin bizia sortu duena, labur bada ere, ezagutaraztea izan du egileak helburua.
Euskal Herriko kontaerak bete-beterik daude sorginez: sorginek badakite hegan egiten, deabrua gurtzen dute aker baten itxuran, haurrak hiltzen dituzte, ekaitzak eragiten eta uztak hondatzen. "Akelarre" izenak euskararen mugak gainditu eta beste hizkuntzetara zabaldu da, sorginen bilkurak adierazteko. Euskal kulturan testigantza asko daude sorginetan sinesten zela frogatzen dutenak, baina zer da, gai honetan, fantasiaren emaitza eta zer egia?
Liburu honetan sorginei buruzko lekuak, esaerak, ohiturak, elezaharrak eta sineskeriak biltzen dira; Euskal Herriko sorginen historiaren berrikusketa bat eskaintzen da, euskal matriarkatu ezagunaren oinarria den Ama Jainkosa baten sinestetik abiatu eta XVII. mendean batez ere Nafarroan eta Lapurdin herri osoak mehatxatu eta ehundaka pertsona sutan bizirik erretzera kondenatu zituzten esespen izugarrietaraino.
Juan Luis Landa, marrazkilari ezagun eta historiako gaietan aditua lankide izan da liburu honen prestaketan: bi ikuspegitatik eskaini du bere ezagutza eta trebetasuna: euskal sorginen errealitatea eta euskal sorginen fikzioa irudietan islatuz. Landak halako ukitu berezi bat eman dio liburu honetarako egin duen irudi bakoitzari. Bigarren aldia da idazleak eta marrazkilariak elkarrekin lan egiten dutela; "Euskal Herriko Elezaharrak" izan zen lehena: 2003an argitaratu zen, eta berebiziko harrera ona izan zuen bai kritikaren bai irakurleen aldetik.
SORGINAK bi bertsiotan argitaratu du EREIN argitaletxeak: gaztelaniaz eta euskaraz, 22 x 31 cm-ko formatoan, azal gogorrez, "Couché" 150gr. paperez eta kolorezko 52 irudirekin: 45 orrialde osokoak eta 7 bi orrialdekoak.

-----------